Тропари святителям. Часть 3.

Тропарь. Спиридону, еп. Тримифунтскому, чдтв.

Спиридон Тримифунтский, еп.

Собора Перваго показался еси поборник и чудотворец,/ Богоносе Спиридоне, отче наш. / Темже мертву ты во гробе возгласив, / и змию в злато претворил еси, / и внегда пети тебе святыя молитвы / Ангелы, сослужащия тебе, имел еси, священнейший. / Слава Давшему тебе крепость, / слава Венчавшему тя, / слава Действующему тобою всем исцеления

Тропарь. Стефану, еп. Великопермскому.

Стефан Пермский (Великопермский), еп.

Божественным желанием, / от юнаго возраста, Стефане премудре, разжегся, / ярем Христов взял еси / и людей оляденевшая древле неверием сердца, / Божественное семя в них сеяв, / евангельски духовне породил есй. / Темже преславную твою память почитающе, молим тя: / моли, Егоже проповедал еси, / да спасет души наша

Тропарь. Стефану Исповеднику, архиеп. Сурожскому.

Стефан Сурожский, исповедник, архиеп.

Яко святитель со Безплотными единожитель быв, / священномучениче Стефане, / восприем бо Крест яко оружие, / и став крепко сопротив иконоукорителя и духоборцев, / не покланяющихся пречистому образу Христа Бога нашего, / и отсекл еси всяку ересь лукавых. / Того ради прием мучения венец, / избавил еси град твой Сурож от всякия неприязни. / И ныне молим тя, святе, / да избавиши нас от всяких злых искушений, и бед, / и вечныя муки.

Тропарь. Тихону, еп. Амафунтскому.

Тихон Амафунтский, еп.

Пустынный житель, и в телеси ангел, / и чудотворец явился еси, Богоносе отче наш Тихоне: / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.

Тропарь. Тихону, еп. Воронежскому, Задонскому чудотворцу.

Тихон Задонский, еп., Воронежский

Православия наставниче, благочестия учителю, / покаяния проповедниче, Златоустаго ревнителю, / пастырю предобрый, / новый России светильниче и чудотворче, / паству твою добре упасл еси / и писаньми твоими вся ны наставил еси, / темже венцем нетления / украшен от Пастыреначальника, / моли Его спастися душам нашим.

Тропарь. Тихону, патриарху Московскому и всея Руси.

Тихон (Белавин), патриарх, Московский и всея Руси

В годину тяжкую Богом избранный / в совершённой святости и любви Бога прославил еси, / во смирении величие, в простоте и кротости силу Божию являя, / положил душу за Церковь, за люди своя, / исповёдниче патриарше святе Тихоне, / моли Христа Бога, / Емуже сораспялся еси, / и ныне спасти землю Русскую и паству Твою.

Тропарь. Феодору, еп. Едесскому.

Феодор Едесский, еп.

Неволею паству святительскую приим, / но волею подвигнувся о Божий Церкви, / и перстию Христова гроба невернаго Моавия царя уверив, / и с телесною слепотою вкупе и душевную ему исцелив, благоверна показа, / с нимже и еретики от Божия Церкве, яко волки, отгнав, / честный святителю Феодоре, / моли спастися душам нашим.

Тропарь. Феодосию, архиеп. Черниговскому.

Феодосий Черниговский, архиеп.

Преудобрен во архиереех, святителю Феодосие, / был еси светило своему стаду, / таже преставился еси в вечныя Обители. / Умоли у Престола Царя Славы избавитися нам от находящих на ны зол / и спастися душам нашим, святе, молитвами твоими.

Тропарь. Феоктисту, архиеп. Новгородскому.

Феоктист Новгородский, архиеп.

Божия Слова Премудрости изрядный служитель, / Ангельскаго жительства истинный подражатель, / Божественныя чистоты рачитель, / архиереом сопрестольниче, преподобным сожительниче, / пастырская красота, / Великому Новуграду похвала, / святителю пречестный Феоктисте, отче наш, / Ему же, Слову Божию, в житии сем послужил еси, / моли спастися душам нашим.

Тропарь. Феофану, Затворнику Вышенскому, еп.

Феофан Затворник, Вышенский, еп.

Православия наставниче, / благочестия учителю и чистоты, / Вышенский подвижниче святителю Феофане богомудре, / писаньми твоими Слово Божие изъяснил еси / и всем верным путь ко спасению указал еси, / моли Христа Бога спастися душам нашим.

Тропарь. Филарету, митр. Московскому.

Филарет * (Дроздов), митрополит, Московский и Коломенский

Духа Святаго благодать стяжав, / богомудре святителю Филарете, / истину и правду разумом просвещенным / людем проповедал еси, / мир и милость сердцем умиленным / страждущим явил еси, / яко учитель веры и страж неусыпный / паству Российскую жезлом правости сохранил еси. / Сего ради ко Христу Богу дерзно­вение имея, / моли даровати Церкве утверждение, / людем и душам нашим спасение.

Тропарь. Филиппу II, митр. Московскому и всея России чудотворца.

Филипп (Колычев), митрополит, Московский и всея Руси

Первопрестольников преемниче, столпе Православия, / истины поборниче, новый исповедниче, святителю Филиппе, / положивый душу за паству твою. / Темже яко имея дерзновение ко Христу, / моли за град же и люди, чтущия достойно светлую память твою.

Тропарь. Фотию, митр. Киевскому и всея Руси.

Фотий Киевский и всея Руси, митрополит

Словес евангельских послушателю / и Божественных учений рачителю, / пре­мудрый наказателю, / всегда страху Господню поучаяися, / в молитвах к Богу простираяися, / заградителю уст кривоглаголющим слово правыя веры, / апостолом сопричастниче, / вере Христовой утвердителю, / пророчески вещателю, святителю Фотие, / моли Христа Бога / умирити мир и спасти души наша.

Тропарь. Антонию Вологодскому.

Иже от юности, Богомудре, возследуя Христу, / во бдениих и в пощениих пребывая, / и паству, от Бога дарованную ти, добре пасый, / и учений Божественных исполняя, и в жизненный путь наставляя: / отнюду же и архиерейства саном почтеся, / Церковь и люди возвеселил еси; / и по преставлении своем чудес лучи испущаеши, / недугом с верою приходящим к тебе исцеление подая, / и слепу младенцу свет дарова, / угодниче Христов, святителю Антоние, / предстоя Престолу Христову с лики Ангельскими, / с нимиже моли Его о нас, притекающих к тебе / получити от него оставление грехов и велию милость.

Тропарь. Василию Кинешемскому.

Днесь колена разслаблена укрепляются, / изнемогшия руце на молитву простираются, /очеса умилением орошаются, / слухи же псалмы и песньми оглашаются, / се бо к нам во славе приходит Христов свидетель верный, / Василий Царственный и Всеблаженный, / лжи и злобы победитель, Златоустов подражатель и веры ревнитель, / темже образ подает верным спасения, / и молится о иже верою и любовию чтущих память его.

Тропарь. Василию, еп. Захолмскому (Серб.).

От юности твоея всего себе Господеви отдал еси, / пребывая в молитвах, трудех и постех, отче Богоносне, / образ был еси добродетели твоему стаду; / сего ради видя Бог твое благое произволение, / поставляет тя Своей Церкви пастыря и добраго архиерея / и по преставлении твоем соблюде святое тело твое нерушимо, святителю Василие. / Темже, яко имея дерзновение, / молися Христу Богу / спастися душам нашим.

Тропарь. Геронтию, митр. Московскому и всея Руси.

Днесь душа всяка веселится / на память успения святителя Христова Геронтия, / премудрости ревнителя / и кротости учителя, / смирению наказателя, / учением Божественных словес верныя насладившаго. / Русскаго митрополита похвалим, / святительства паству приимшаго, / украсившаго Церковь Христову. / Тем и Христос видя твое благопроизволение, / причте тя в лик праведных, / святителю Геронтие, / моли Христа Бога и Пречистую Богородицу / непрестанно о всех нас.

Тропарь. Евфимию, патриарху Болгарскому.

Подвигом пустынным просиял еси / и на престол первосвятительства по достоянию возшел еси, / отонудуже лучами Боговедения и добродетели всех озарил еси / и чашу мученичества безкровно отпил есй. / Ныне же предстоя престолу Горняго Иерусалима, Евфимие, / моли седящаго на нем Христа Бога нашего / о почитающих честную память твою.

Тропарь. Иконе свт. Николая "Зарайская".

Пресветлый храме Святаго Духа, / Богомудре отче Николае, / благодатию небес освяти души наша, / заступи и покрый всечестным твоим омофором, / его же приял еси от рук Пречистыя Девы, / и просвети нас светом заповедей Христа, /от Него бо приял еси глаголы жизни. / Моли благость Отца Небеснаго, / во еже спастися / православно чтущим тя, / даруя нам велию милость.

Тропарь. Илариону, митр. Суздальскому.

Воспойте убо, вей людие, / в Триех Ипостасех Единаго Бога, / на Небесех не­постижно пребывающаго, / мановением же всяческая управляющаго, / на землю же щедротно призирающаго, / в пустынном же пребывающаго противу невидимых врагов, / угодника Своего преподобнаго Илариона укрепльшаго, / того молитвами, Боже, помилуй и спаси на

Тропарь. Иннокентию, архиеп. Херсонскому.

От юных лет прилежа учению благочестия и страху Божию, / во благодати Христовой преуспевая, / стяжал еси словесная дарования / и явился еси неутомимый проповедниче спасения, / души верных озаряя спасительными смыслы / и приводя всех ко исправлению. / Святителю отче Иннокентие, / моли Христа Бога / дати нам оставление грехов и велию милость.

Тропарь. Иоанну (Максимовичу), архиеп. Шанхайскому и Сан-Францисскому.

Попечение твое о пастве в странствии ея, / се прообраз и молитв твоих, за мир весь присно возносимых: / тако веруем, познав любовь твою, святителю и чудотворче Иоанне! / Весь от Бога освящен священнодействием пречистых Тайн, / имиже сам присно укрепляем, / поспешал еси ко страждущим, целителю отраднейший. / Поспеши и ныне в помощь нам, всем сердцем чтущим тя.

Тропарь. Максиму Новому, бывшему деспоту Сербскому.

Странное рождение и воспитание был еси отче, / но паки водворися во власти у своего народа, / Небеснаго Царствия желая, / земное царствие оставил еси / и смирением Вышнее сокровище получил еси, / преблаженне Максиме, / моли, молимся, о душах наших.

Тропарь. Михаилу, первому митр. Киевскому.

Днесь пророчествие во апостолех Первозваннаго исполнися: / се бо на сих горах возсия благодать и вера умножися. / И иже неверием обветшавший / Божественною купелию отродишася / и быша людие обновления, / царское священие, язык свят. Христово стадо, / емуже ты первый пастырь явился еси, / яко первее Крещением послуживый. / И ныне, предстоя Владыце Христу Богу, / моли всем сыном русским спастися: / имаши бо дерзновение яко иерарх Божий и священнослужитель

Тропарь. Нектарию Эгинскому, митр. Пентапольскому.

Преподобнически пожив, яко мудрый иерарх, / прославил еси Господа / добродетельным житием, Нектарие преподобие. / Темже, Утешителя прославлен силою, / Божественными мощми твоими, / демоны отгониши и болящия исцеляеши, / верою приходящия ти. /

Тропарь. Нифонту, патриарху Константинопольскому.

Делы просиял еси благочестия, / высокотворным смирением украшаемь, / Афона похвало, патриархов удобрение, / Нифонте славне, / молися о нас, любовию славящих тя.

Тропарь. Павлу, митр. Тобольскому.

Прославим, вернии, благочестие возлюбившаго / и от юности иго Христово усердно восприимшаго, / ревностнаго святителя Церкве Российския, / в Богоспасаемом граде Тобольске подвизавшагося. / Ты же, Богомудре отче Павле, / телом убо в нетлении почивая, / духом же Престолу Божию предстоя, / моли спасти ся всем нам.

Тропарь. Павлу, патр. Константинопольскому, исп.

Божественныя веры исповеданием / другаго Павла тя Церковь, ревнителя во священницех, показа, / свозопиет ти и Авель ко Господу, / и Захариина кровь праведная. / Отче преподобие, Христа Бога моли / дароватися нам велией милости

Тропарь. Перенесение Великорецкой иконы свт. Николая из Вятки в Москву.

Яко драгоценное богатство, / прииде к нам от Великия реки Вятки / в царствующий сей град наш Москву / честная икона образа твоего, святителю Николае, / и многая убо чудеса в пришествии своем сотвори, / болящия исцели и вся человеки удиви./ Сего ради повелением самодержца царя / списася с нея сия честная икона твоя / на просвещение и моление всем людем царска града, / юже днесь зрим и покланяемся ей, / моляще тя, тайнника Христова: / моли, святе, о всех нас, / даровати нам мир и велию милость.

Тропарь. Тому же святому (Перенесение мощей).

Присне день светлаго торжества, / град Барский радуется, / и с ним вселен­ная вся ликовствует / песньми и пеньми духовными: / днесь бо священное торжество / в пренесение честных и многоцелебных мощей / святителя и чудотворца Николая, / якоже солнце незаходимое, возсия светозарными лучами, / разгоняя тьму искушений же и бед / от вопиющих верно: / спасай нас, яко предстатель наш великий, Николае.

Тропарь. Тому же святому (Рождество).

Чудное и славное рождество твое, святителю Николае, / Церковь днесь православных светло празднует, / ибо стоянием ногу твоею / яви тя Господь и провозвести быти светильника и учителя миряном, / весь мир обогащающа и просвещающа чудесы. / Тем вопием ти: / моли Христа Бога спастися душам нашим

Тропарь. Феодору, архиеп. Ростовскому.

От юности, премудре, прилежно подвизався, / и извещением Святаго Духа / превеликую обитель воздвиже Пресвятей Богородице / в похвалу Рождества Ея, / струями же слез твоих безплотныя враги погрузил еси, / и, жития твоего целомудрием со Ангельскими лики совокупився, / преподобие отче Феодоре, / с ними же Христа Бога моли / спастися душам нашим.

Тропарь. Феодору, еп. Суздальскому.

В молитвах бдя, сердцем же о стаде твоем выну болезнуя, / учением своим всех просветил еси, Феодоре премудре, / темже Христа Бога моли, / в день памяти твоея даровати нам велию милость.

Тропарь. Филиппу I, митр. Московскому.

Чудо явися, извещением и делы возсияв, / Духа Святаго произбранием святительства паству приим, / откровением Божиим церковь разобра / и величайшую воздвиже, / всечестне Филиппе, святителю великий, / мир граду даруй нашему Москве / и велию милость.

См. также:

• Тропари святителям. Часть 1
• Тропари святителям. Часть 2