Тропари преподобным. Часть 2.

Тропарь. Афанасию Афонскому.

Афанасий Афонский, игумен

Еже во плоти житию твоему / удивишася ангельстии чини: / како с телом к невидимым сплетением изшел еси, приснославне, / и уязвил еси демонские полки. / Отонудуже, Афанасие, / Христос тебе воздаде богатыми дарованьми, / сего ради, отче, моли / спастися душам нашим.

Тропарь. Афанасию и Феодосию Череповецким.

Афанасий Череповецкий

Феодосий Череповецкий, прп.

Яко всехвальнии ученицы / великаго покровителя и заступника земли Русской, / Богоноснии отцы наши Афанасие и Феодосие, / от юности вашея крест Христов на рамена вземшии, / усердно Тому последовали есте / и добре потрудилися в Сергиевой обители. / Отонудуже Божиим изволением прибывша, / благочестно во граде нашем Череповце подвизалися есте, / и обитель Воскресе­ния Христова устроиша, / молитвою и трудом Богу угодивше, / от Него венец славы Небесной прияли есте, / и ныне святыми своими телесы / в соборнем храме под спудом почивающе, / духом же вкупе с преподобным Сергием / у Престола Всевышняго предстоя, / о нас молитеся прилежно / избавитися нам от всех бед и скорбей / и спастися душам нашим.

Тропарь. Афанасию Высоцкому (Младшему), Серпуховскому.

Афанасий Младший,Серпуховской,Высоцкий, прп.

Образ Божий в богосотворенней душе твоей, / ум, слово, и дух соблюдая / вперился еси отче преподобне Афанасие, / любовию ко Всетворцу Богу, / и сего ради / молитвы, труды, и подвиги добродетельныя восприим, / прешел еси в вечныя небесныя кровы. / Отнюдуже назирай нас / моля Святую Троицу, / еже наследити нам горнее всерадостное блажен­ство.

Тропарь. Ахиле, диакону Печерскому, в Дальних пещерах.

Ахила Печерский, диакон

Постническое житие облобызав / и многими труды от младых ногтей себе обложив, / на степень диаконства произведен быв, всечестне, / в коем служил еси в церкви Божия Матере непорочне, / Ейже молися, / во еже спастися душам нашим

Тропарь. Варлааму Хутынскому.

Варлаам Хутынский, прп.

Иже на земли леганием, / пощением же и бдением / тело твое изнуряя, преподобне, / вся плотская мудрования умертвил еси; / и исцелений струя независтная явился еси / верою притекающим к тебе, Варлааме отче наш, / моли Христа Бога / спастися душам нашим.

Тропарь. Варлааму, игумену Печерскому, в Ближних пещерах.

Варлаам Печерский, игумен, (1й)

Мира красная и славу его оставль, / притекл еси в пещеру, / идеже от силы преуспевая в силу, / был еси вождь Христова стада, всеславне Варлааме, / еже яко упас добре, упаси и нас, молим тя, / сохраняя от всех зол, да тя ублажаем.

Тропарь. Варлааму Индийскому.

Варлаам Индийский, пустынник, иерей

Слез твоих источники пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенныя, сияя чудесы, Варлааме отче наш, / моли Христа Бога спастися душам нашим.

Тропарь. Варлааму Важскому, Шенкурскому.

Варлаам Пинежский, Важский, Шенкурский, прп.

Иже к добродетелем прилежанием взыграния плоти обуздал еси, / благими нравы душу свою украсив, / от земных Христу превозведе ум свой, / тем от Него исцелением струя независтна явися, / притекающим верою к тебе и любезно зовущим: / Варлааме, отче наш, / моли Христа Бога, / да спасет души наша.

Тропарь. Варнаве Ветлужскому.

Варнава Ветлужский, прп.

Желанием духовным распалився / и мятежи мирския отринув, / к Богу любовию прилежно присовокупися. / И Того вседушне взыскуя, во внутреннюю пустыню отшел еси, / при водах вселися, / идеже во слезах и трудех пребывая многолетное время, / в терпениих мнозех житие ангельское проходил еси / в наставлении Божественнаго разума / и множество монахов собрал еси, мудре, / ихже, посещая не остави, / Варнаво преподобне, отче наш, / Пресвятей Троице моляся, / от зол всяческих избавити и спасти души наша.

Тропарь. Василию Декаполиту.

Василий Декаполит, прп., исповедник

Пустынный житель, и в телеси Ангел, / и чудотворец явился еси, Богоносе, отче наш Василие, / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Вассиану и Ионе Пертоминским, Соловецким чдтвв.

Вассиан Пертоминский, Соловецкий, прп.

Иона Пертоминский, Соловецкий, прп.

Прежде отвержением мира, / яко морскаго треволнения, избегосте, отцы преподобнии, / послежде же, изволением Божиим, / в водах морских кончину блаженную приясте / и к неболезненному покою преставистеся от земли радующеся. / Тем и по кончине от Христа Бога прославистеся чудесы обильно,/ теплии в бедах верным помощницы показастеся, / и ныне на Небесех предстояще Престолу Христову, / Вассиане преблаженне и Ионо преславне, / молитеся присно о душах наших.

Тропарь. Вениамину Печерскому, в Дальних пещерах.

Вениамин Печерский, затворник

Добр купец бысть, Богомудре Вениамине, / богатство бо свое тленно раздав, / купил еси оным нетленное в Царствии небеснем, / в немже ныне тамошних благ наслаждаяся богатне, / проси нам мира и велия милости.

Тропарь. Галактиону Вологодскому.

Галактион Вологодский, затворник, прмч.

Днесь град Вологда тобою всемирне хвалится, / возсиял бо еси пресветло яко солнце / и чудесы твоими град и веси, преподобне Галактионе, озарил еси. / И ныне молися Господеви / избавитися душам нашим от прелести вражия / спастися граду нашему от поганскаго и всех противных наития, / и испроси у Христа Бога любовию чтущим тя / прегрешений прощения / и просящим твоея помощи от всякия скорби избавление, и вопиющим к тебе: / Бог наш с нами, прославивый угодника Своего, яко же благоволи

Тропарь. Геннадию Костромскому и Любимоградскому.

Геннадий Костромской и Любимоградский

Яко пустыннолюбивая горлица, / от суетнаго и многомятежнаго мира в пустыню удалився, / чистотою и говением, молитвами и труждением / прославил еси Бога в душе и телеси своем. / И тако благочестно пожив, / явился еси, преподобне Геннадие, пустыни Любимоградския украшение, / иноком честнаго жития образ / и теплый молитвенник за всех, / притекающих к тебе с верою.

Тропарь. Герасиму Вологодскому.

Герасим Вологодский, прп.

Яко Безплотным единонравен / и преподобным сообщник, преподобне Герасиме, / един на Вологду пришел еси, / прорицая ту быти граду великому / и в нем святей церкви воздвигнутися / и святителем водворитися. / Темже и сподобился еси / близ того погребен быти / и по преставлении своем многими чудесы исцелений просил еси. / Молися всегда о нас, / яко да обрящем от Бога милость.

Тропарь. Герману Соловецкому.

Герман Соловецкий, отшельник

Желанием духовным от юности распаляемь, преподобне Германе, / Христу тесным жития путем последовал еси / и, в морский пустынный остров, аки в тихое пристанище, вселився, / в нем многа лета постнически пожил еси, / идеже блаженным отцем Зосиме и Савватию сожитель был еси, / с ними же моли Христа Бога о нас, / любовию чтущих святую память твою.

Тропарь. Зосиме, Савватию и Герману Соловецким.

Зосима Соловецкий, игумен

Савватий Соловецкий, прп.

Герман Соловецкий, отшельник

Яко светильницы явистеся всесветлии / во отоце окияна моря, / преподобнии отцы наши Зосимо, Савватие и Германе, / вы бо крест Христов на рамо вземше, / усердно Тому последовасте / и, чистотою Богови приближившеся, / отунудуже силами чудес обогатистеся. / Темже и мы любезно притекаем к ракам честных мощей ваших и умильно глаголем: / о, преподобнии, молите Христа Бога спастися душам нашим.

Тропарь. Сергию и Герману, Валаамским чдтвв., глас 4:.

Сергий Валаамский, прп.

Герман Валаамский, прп.

Евангелия Христова истиннии послушницы явистеся, преподобнии, / мир и вся яже в нем, яко не сущая преобидевше любве ради Христовы, / и в морский остров вселистеся, / и трудолюбно в нем противу козней невидимых врагов подвизастеся, / постом, бдением же и всенощным стоянием / плоти своя духу мудре повинули есте. / Сего ради от вседержительныя десницы / достойныя венцы прияли есте. / И ныне Пресвятей Троице предстояще, / молитеся, всеблаженнии отцы Сергие и Германе, / сохранитися в мире отечеству нашему, и спастися душам нашим.

Тропарь. Герману Аляскинскому.

Герман Аляскинский, прп.

Звездо пресветлая Церкве Христовы, / на севере просиявшая, / вся к Царствию Небесному путеводящая, / учителю и апостоле истинныя веры, / предстателю и заступниче гонимых, / украшение изящное Святыя Церкве во Америце, / преподобне отче Германе Аляскинский, / молися ко Господу, Спасу нашему, / спастися душам нашим.

Тропарь. Геронию и Леонтию, канонархам Печерским, в Дальних пещерах.

Геронтий Печерский, канонарх

Леонтий Печерский, канонарх

Двоице святая, / правилоначальная, бывшая в церкви / и в правиле иночестем возсиявшая светло, / всечестнии канонарси, / молите Христа Бога, / да прегрешений оставление / подаст душам нашим.

Тропарь. Геронтию, канонарху Печерскому, в Дальних пещерах.

Геронтий Печерский, канонарх

Всечестный канонарше Геронтие, / правилоначальный бывый в церкви / и в правиле иночестем возсиявший светло, / моли Христа Бога, / да прегрешений оставление / подаст душам нашим.

Тропарь. Григорию Декаполиту.

Григорий Декаполит, прп.

Образ был еси воздержания, / Божественным Духом вся просветив: / правоверия течение совершил еси, / учением мир просветил еси / и зловерных обличил еси смыслы, / отче преподобне Григорие, / Христа Бога моли даровати нам велию милость. --------------------------------------------------------------------------------

Тропарь. Григорию и Кассиану Авнежским.

Григорий Авнежский, сщмч., игумен

Кассиан Авнежский, прмч., келарь

Православия наставницы, / благочестия и чистоты учителие, / Церкви Вологодстей богодарованное украшение, / преподобнии отцы наши Григорие и Кассиане, / молите Милостиваго Бога, / да вашим предстательством подаст благодать и мир стране нашей / и душам нашим спасение.

Тропарь. Григорию Пельшемскому, Вологодскому чдтв.

Григорий Пельшемский, Вологодский, игумен

Любовию Христовою, богомудре, просветився, / добродетельми облистал еси: / и всякое наслаждение плотское возненавидев, / и в пустыню вселився, в нейже вельми подвизался еси в жизни сей временней / в пениих и во бдениих, и в пощениих. / Сего ради и Христос даром чудес обогати тя: / но поминай нас чтущих пресветлую память твою, преподобне отче Григорие, / и моли Христа Бога, спастися душам нашим.

Тропарь. Григорию, затворнику Печерскому, в Дальних пещерах.

Григорий Печерский, затворник

Пещерный житель и в телеси Ангел / и чудотворец явился еси, Богоносе отче наш Григорие, / постом, бдением, молитвою Небесная дарования приим, / исцеляеши недужныя и души верою приходящих ти. / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Григорию, чудотворцу Печерскому, в Ближних пещерах.

Григорий Печерский, прмч.

Великих дарований приемниче / и великих чудес силою Божиею творителю, / пречудне отче Григорие, / яко велие дерзновение имея ко Христу Богу, / непрестанно о нас молися Ему, / да грехов оставление / подаст душам нашим.

Тропарь. Дамиану пресвитеру, целебнику, Иеремии и Матфею прозорливым, Печерским, в Ближних пещерах.

Дамиан Печерский, пресвитер

Иеремия Печерский, Прозорливый

Матфей Печерский, Прозорливый

Христовых повелений светом сердца своя просветивше, / страстный мрак прогнасте, / те Троицы селение бысте тричисленнии отцы, / Дамиане, Иеремие с Матфеем, / от Неяже благодать приемше, / недужныя исцеляете, будущая возвещаете / и, Ангелом сопричастницы суще, / молитеся Христу Богу даровати нам причастие святых.

Тропарь. Даниилу Переяславскому.

Даниил Переяславский, архимандрит

От юности, блаженне, всего себе Господеви возложив, / выну повинуяся Богу, / противяся же диаволу, / над страстьмй греховными воцарился еси, / тем сам храм Божий быв, / и обитель красну во славу Пресвятыя Троицы воздвигнув / и собранное тобою в ней стадо Христово Богоугодно упасши, / преставился еси к вечным обителем, / отче Данииле, / моли Триипостаснаго во едином Существе Бога спастися душам нашим.

Тропарь. Даниилу Столпнику.

Даниил Столпник, прп.

Терпения столп был еси, / ревновавый праотцем, преподобне,/ Иову во страстех, Иосифу во искушениих, / и Безплотных жительству / сый в телеси, Данииле, отче наш, / моли Христа Бога спастися душам нашим,

Тропарь. Дию Константинопольскому.

Дий Константинопольский, игумен

Пустынный житель, и в телеси Ангел, / и чудотворец явился еси, Богоносе отче наш Дие: / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Димитрию Прилуцкому, Вологодскому.

Димитрий Прилуцкий, Вологодский, игумен

Свыше от Бога, преподобне, / благодать приял еси духовную, / и от Него убо познался еси, блаженне, / того ради и ты духом познал еси лучшая Его, / будущаго века пребывание, / и постнически испытався во своих обителех. / И ныне со ангели ликовствуя, / Спасу всех за ны молися, святе Димитрие, да вси вопием: / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Диодору Юрьегорскому.

Диодор * Юрьегорский

Желанием духа распалився, / мятеж мирский отринув, / ко Единому Богу любовию прилепися / и Того вседушне взыскуя, / во внутреннюю пустыню отыде, / при водах вселися, / идеже в слезах и трудех пребывая многолетное время, / в терпении мнозе житие Ангельское проходил еси / в наставлении Божественнаго разума, / стадо инок собра мудре, / ихже посещая, не остави, Диодоре преподобне, отче наш, / Пресвятей Троице моляся / от зол всяческих избавити и спасти души наша.

Тропарь. Дионисию, затворнику Печерскому, в Дальних пещерах.

Дионисий Печерский, Щепа, затворник, иеромонах

Жертву Безкровную приносивый Господеви непорочне / и служивый Ему по званию своему многое время неленостне, / священне Дионисие, / молися о нас, / любовию чтущих тя.

Тропарь. Дионисию, игумену Глушицкому.

Дионисий Глушицкий, игумен

Божественною любовию от юности распалаемь,/ Дионисие преподобне, / вся, яже в мире красная, возненавидев, / Христа единаго возлюбил еси / и сего ради во внутреннюю пустыню вселился еси, / со зверьми живый, весь Христови. / Отонудуже и Всевидящее Око, твоя труды видев, / даром чудес и по преставлении обогатил тя есть. / Темже вопием ти: / моли непрестанно о всех нас, / честную память твою присно / в песнех почитающих.

Тропарь. Дионисию Радонежскому.

Дионисий Радонежский, архимандрит

Земная, прельщающая очеса миролюбцев, / возненавидел еси, отче Богоносне Дионисие, / за уметы та вменив, / шествуя путем скорбным, / и в терпении добр воин Христов явился еси, / победив страсти мира, / был еси до кончины непоколебимый благочестия поборник./ Темже мы днесь, совершая священную память твою, / духовными тя песньми ублажаем и смиренно молим, / да, предстоя Престолу Господа Бога, / ходатайствуеши о спасении душ наших.

Тропарь. Досифею Верхнеостровскому, Псковскому.

Досифей Верхнеостровский, Псковский, игумен

Яко светильник всесветел явился еси во острове Псковскаго езера, / преподобне отче наш Досифее. / Ты бо крест Христов от юности своея на рамо взем, / усердно Тому последовал еси, / чистотою Богови приближився, / отонудуже и чудес дарованием обогатился еси. / Темже и мы, притекающе ко святей иконе твоей, умильно глаголем: / отче преподобне, моли Христа Бога / спастися душам нашим.

Тропарь. Феоктисту, бывшему Драгутину, королю Сербскому, глас 4:.

Драгутин(в иночестве Феоктист), Сербский, прп., король

Божественнаго страха огнем душу свою распалил еси, / очистився покаянием и украсився кротостию и смирением, востекл еси к невечернему Свету — Христу, / преподобне отче Феоктисте, / и ныне, трисолнечным светом озаряемь, / на Небеси ликуеши, / моли о нас, верою почитающих честную память твою.

Тропарь. Евфросинии, в миру Евдокии, вел. кн. Московской.

Евдокия(в инокинях Евфросиния), Московская, великая княгиня

По земнем вдовстве Небесному Жениху себе уневестивши / и в княжестем чертозе подвижнически поживши, / послежде и чертог, и чад твоих Бога ради оставила еси, / преподобная Евфросиние, / и, вшедши во обитель, тобою созданную, / во иноческом образе многи подвиги показала еси, / и святое житие по благодати Божией блаженною кончиною увенчала еси /. И ныне, предстоящи Христу Богу, / моли спастися душам нашим.

Тропарь. Евфимию, схимнику Печерскому, в Дальних пещерах.

Евфимий Печерский, иеросхимонах

Евфимие всечестне, / преподобным единоревнителю и Ангелом собеседниче, / получивый с ними житием своим чистым и безмолвным вечная благая, / молися Господеви присно о всех нас, / да и мы тех же благ сподобимся.

Тропарь. Евфимию, архим. Суздальскому, чдтв.,.

Евфимий Суздальский, архимандрит

Яко светозарная звезда, / пришел еси от востока на запад, / оставив отечество твое, Нижний Новград, / и, дошед богоспасаемаго града Суждаля, / в нем обитель сотворил еси, / и собрал еси монахов множества, / и, прием дар чудес от Бога, отче Евфимие, / был еси о Христе собеседник / и спостник преподобному Сергию. / С нимже у Христа Бога испроси нам здравие, и спасение,/ и душам нашим велию милость.

См. также:

• Тропари преподобным. Часть 1. Авксентий-Афанасий
• Тропари преподобным. Часть 3. Евфимий-Ипатий
• Тропари преподобным. Часть 4. Иринарх-Марон
• Тропари преподобным. Часть 5. Мартин-Паисий
• Тропари преподобным. Часть 6. Паисий-Сильвестр
• Тропари преподобным. Часть 7. Симеон-Харитон. Анастасия-Гавриил
• Тропари преподобным. Часть 8. Григорий-Феодосий