Тропари преподобным. Часть 6.

Тропарь. Паисию Великому, глас 2:.

Паисий Великий, прп.

Божественною любовию от юности распалаемь, преподобне, / вся красная, яже в мире, возненавиде, / Христа единаго возлюбил еси, / сего ради в пустыню вселися, / идеже сподобися Божественнаго посещения, / Егоже неудобь зрети и ангельскима очима, / паде, поклонися. / Великий же Дародатель, яко Человеко­любец рече к тебе: / не ужасайся, возлюб­ленный Мой, / дела твоя угодна Мне. / Се даю тебе дар: / о коем-либо грешнице помолишися, / отпустятся ему греси. / Ты же в чистоте сердца твоего возгореся, / прием воду и прикоснуся Неприкосно­венному, / умы нозе Его / и, воду пив, да­ром чудес обогатися, / болящия исцеляти, бесы от человек отгоняти / и грешни­ки от муки молитвою своею избавляти. / О преподобне отче Паисие, / молю тя, да умолиши и о мне, / якоже тебе Бог обетова, / ибо от сих грешник первый аз есмь, / да даст ми Господь время покаяния / и простит мое согрешение, / яко Благий и Человеколюбец, / да со всеми и аз воспою Ему: аллилуия.

Тропарь. Паисию Величковскому, глас 2:.

Паисий Величковский, прп.

Странен быв на земли, / Небеснаго Отечества достигл еси / преподобне отче Паисие, / добротолюбия подвижниче, / верных научил ум к Богу возводити / и сердцем к Нему взывати: / Господи Иисусе Христе, Сыне Божий, / помилуй мя, грешнаго.

Тропарь. Паисию Галичскому, глас 8:.

Паисий Галичский, архимандрит

Днесь возсия нам память твоя, славне Паисие, / яко солнце светозарное, лучами озаряющи весь мир, / тако и ты, преподобне, / чудесы своими тьму нощи злых духов от нас отгоняя; / днесь Небесныя силы, и святых Ангел, / и души праведных мысленно торжествуют, радующеся; / днесь и мы, грешнии, припадающе честному твоему образу молимся: / о, преподобне Паисие, / Христа Бога моли непрестанно / спасти град и люди, иже тебе почитающия.

Тропарь. Паисию Печерскому, в Дальних пещерах, глас 4:.

Паисий Печерский

Великаго во отцех подражая Паисия, / якоже он в пустыню, тако и ты в пещеру вселился еси, / идеже труды прилагая, блаженне, ко трудом, / и псаломскому пению выну прилежал еси, / моли о нас, поющих тя.

Тропарь. Паисию Угличскому, глас 8:.

Паисий Угличский, игумен

Христовы ради любве отечество и род оставил еси,/ и, ангельскому житию поревновав,/ в пустыню вселился еси, / в нейже многотрудное житие явил еси / и чудес дарования от Бога приял еси, / Паисие преподобне, / моли Христа Бога спастися душам нашим.

Тропарь. Паисию Хилендарскому (Болг.), глас 4:.

Паисий Хилендарский (Афонский), Болгарский, прп.

Кирилла равноапостольнаго язык, / защитив обновил еси / и Патриарха Евфимия благословение Тройческое, предначав, / исполнил еси. / Твоим бо трудом болгаром / паки внятным их языком благочестие воспроповедася, / и тобою первее начат Промысл Тройческий — / дело освобождения рода Болгарскаго. / Сего ради тя почитаем, / Паисие блажен­не, / и любовию совершаем честную память твою.

Тропарь. Палладию Александрийскому, глас 1:.

Палладий * Александрийский, прп.

Монашествовав Богоугодно, Богоносне отче наш, / молитвою и постом Бога взыскал еси / и был еси приятелище чисто Духа, / блистая верным добродетельныя зари, / имиже просвещаеши вся чтущия тя. / Слава прославльшему тя Христу, / слава Укрепльшему тя, / слава Действующему тобою всем исцеление.

Тропарь. Памве, пустыннику Нитрийскому, глас 5:.

Памва(Памво), Нитрийский, пустынник

В пустыни живый в толстинных и многошвенных твоих ризах, / и без тщеславия и мятежа внутрь поя Богови, / и человеча деяния собою прообразовав в наказание, отче Памво, / моли Христа Бога, / да спасет души наша.

Тропарь. Памве, затворнику Печерскому, в Дальних пещерах, глас 1:.

Памва Печерский, затворник, исповедник, иеромонах

Неленостным послушанием / и отвержением воли своея / крепко себе обуздав, / вдался еси за Христа Бога на муки и раны, / от Негоже сугубо, всечестне отче Памво, венчався, / молися о душах наших.

Тропарь. Панкратию Печерскому, в Дальних пещерах, глас 2:.

Панкратий * Печерский, затворник

Панкратие Богомудре,/ священниче Господень изрядне, / и чудес многих самодетелю, / молися Господеви, / во еже спасти души наша.

Тропарь. Параскеве Сербской, глас 4:.

Параскева Петка, Сербская, Болгарская, прп.

Пустынное и безмолвное житие возлюбивши, / и во след Христа, Жениха твоего, усердно потекши, / и Того благое иго во юности твоей вземши, / Крестным знамением к мысленным врагом мужески вооружившися, / постническими подвиги, постом, и молитвами, и слезными каплями / углие страстей угасила еси, достославная Параскево: / и ныне в Небеснем чертозе / с мудрыми девами предстоящи Христу, / моли о нас почитающих честную память твою.

Тропарь. Пафнутию Боровскому, глас 4:.

Пафнутий Боровский, игумен

Жития светлостию просветив твое отечество, / в молитвах и постех дарований Божественнаго Духа исполнился еси, / и, во временней сей жизни добре подвизався, / милость благоутробия всем скорбящим отверзл еси, / и нищим был еси заступник. / Тем молим тя, отче Пафнутие, / моли Христа Бога, да спасет души наша.

Тропарь. Пафнутию, затворнику Печерскому, в Дальних пещерах, глас 2:.

Пафнутий * Печерский, затворник

Велия веры исправления, / в пещернем затворе, яко на воде упокоения, / преподобне отче Пафнутие, радовался еси, / огнем бо любве Божественныя распаляемь, / бдением и молитвою безстрастия достигл еси / и явился еси равноангельный на земли, / того молитвами, Христе Боже, спаси души наша.

Тропарь. Пахомию Великому, глас 8:.

Пахомий Великий, Египетский, Фиваидский, прп.

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, сияя чудесы, Пахомие отче наш, / моли Христа Бога спастися душам нашим.

Тропарь. Пахомию Нерехтскому, глас 1:.

Пахомий Нерехтский, Сыпановский, Костромской, прп.

Житейских молв, преподобне, отвергся / и, яко птищ, обрете себе в пустыни безмолвие, / в молитвах и бдении прилежа Богови, / преподобне отче Пахомие, / и остави древнее пребывание, / и отыде в пустыню, и в ней водворися, / и состави обитель во Имя Пресвятыя Троицы, / и процвел еси, аки финикс, / и бысть образ утешения духовнаго. / Темже, преподобне Пахомие, / моли Пресвятую Троицу / спастися душам нашим.

Тропарь. Петру Афонскому, глас 4:.

Петр Афонский, прп.

Мир оставил еси, Петре, Господа ради своего / и крест восприим на рамо свое, / на гору достигл еси Афонскую, / якоже древле фесвитянин Илия. / И в ней пребыв пощением, и молитвами, и бдением, / Бога милостива творя, / и Пречистую Богородицу Молебницу предлагая, / сего ради вопием ти: / моли Христа Бога, да спасет души наша.

Тропарь. Петру, царевичу Ордынскому (Ростовскому), глас 8:.

Петр Ордынский, Ростовский, прп., царевич

Отечества своего, блаженне Петре, удалився,/ и богомерзкую веру отнюд возненавидев, / от тьмы во свет пришел еси / и вселился еси во славный и многонародный град Ростов, / в немже житие честно пожив, / церковь во имя святых апостол Петра и Павла воздвигл еси Христовою благодатию, / и сию чудными иконами, яко невесту, украсив, / святителя же, и князя, и вся люди житием своим удивил еси, / темже и по смерти твоей Христос даром чудес обогати тя. / Поминай нас, чтущих пресветлую память твою, преподобне отче Петре, / и моли Христа Бога спастися душам нашим.

Тропарь. Пимену, постунику Печерскому, в Дальних пещерах, глас 8:.

Пимен Печерский, постник, игумен

Постом душу твою просветил еси, / молитвами непрестанными сердце твое сосуд Духа Святаго соделал еси, / преподобне отче наш Пимене; / темже вся вражия ополчения крепко посрамил еси / и, яко победоносец истинный, / воздаяние получил еси от Христа Бога. / Тому помолися о душах наших.

Тропарь. Пимену Великому, глас 8:.

Пимен Великий, Египетский, прп.

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Пимене, отче наш, / моли Христа Бога спастися душам нашим.

Тропарь. Пимену Многоболезненному, Печерскому, в Ближних пещерах, глас 5:.

Пимен Печерский, Многоболезненный

Богоноснаго Антония смиренномудрием подражая, / терпением Иову подобяся, / не исцеления от болезни, но паче протяжения тоя / желал еси себе, терпеливодушне Пимене, / да не како, здрав быв / и от места сего родительми исторжен, / сожития преподобных и чина их лишишися, / тем паче надежды от самих Ангел пострижен был еси, / с нимиже моли Христа Бога / спастися душам нашим.

Тропарь. Пиору, затворнику Печерскому, в Дальних пещерах, глас 5:.

Пиор * Печерский, затворник

Затворивыйся в месте темне, Богоблаженне Пиоре, / и отнюд света сего и всяких прелестей в нем сущих зрети нехотевый, / Света же днесь Невечерняго сподоблься, / моли и нам Светом темже озаритися.

Тропарь. Поликарпу, архим. Печерскому, в Ближних пещерах, глас 4:.

Поликарп Печерский, архимандрит

Тезоименит званию твоему, / яко многоплодное древо, / насажден сый во обители Божия Матере, / многая и чудная тщанием твоим исправления показавый, / мудре Поликарпе, / моли Христа Бога о нас, / яко да и мы, многия плоды добродетелей Ему принесше, спасемся.

Тропарь. Поликарпу Брянскому, глас 1:.

Поликарп Брянский, игумен

Ветрилом креста душевный корабль окормив,/ житейская красная оставил еси, / и от мирскаго мятежа изшед, / плотския похоти воздержанием многим, отче, умертвил еси, / пощением и слезами, молитвами и песньми непрестанно прилепляяся Богу: / темже и жилище достойно Духа Пресвятаго показался еси./ Моли, Поликарпе преподобне, Христа Бога/ оставление прегрешений даровати нам и велию милость.

Тропарь. Прокопию Декаполиту, исп., глас 8:.

Прокопий Декаполит, исповедник

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Прокопие отче наш. / Моли Христа Бога спастися душам нашим.

Тропарь. Прохору Печерскому, в Ближних пещерах, глас 4:.

Прохор Печерский, Лебедник

Преподобне и чудотворче, отче Прохоре, / препитавый во гладе алчущия хлебом от былия и солию от пепела, / напи­тай и нас пищею духовною, / моля Хрис­та Бога / о душах наших.

Тропарь. Руфу, затворнику Печерскому, в Дальних пещерах, глас 8:.

Руф Печерский, затворник

Послушание святое, нарицающееся живот, / преподобне отче Руфе, прием, / живот вечный оным постигл еси, / идеже живя, не забуди и нас, хвалящих тя.

Тропарь. Стефану, в иночестве Симеону, царю Сербскому, Мироточивому и святителю Савве I, архиеп. Сербскому, глас 1:.

Симеон(в миру Стефан Неманя, царь Сербский), Мироточивый, Хилендарский, Афонский

Савва I Сербский, архиеп.

Обители Хиландарския священных строителей / и Афона светильники, Сер­бии похвалу, / Симеона величайшаго, преподобных лепоту, / и род его чудный, святителя, — глаголю, — Савву, / приидите согласно почтим, глаголя: / молите Христа Бога / о пастве вашей, блаженнии, / и о еже Церкви свободней быти от обстояний.

Тропарь. Савве Вишерскому, Новгородскому, глас 4:.

Савва Вишерский, Новгородский, прп.

От юности твоея весь Богу поработился еси, блаженне, / и Того ради любве отечество и род оставил еси, / в пустыню вселився / и в ней жестокое житие пока­зав, / чудес дарования от Господа приял еси, / Савво преподобне, / моли Христа Бога спастися душам нашим.

Тропарь. Савве Крыпецкому, Псковскому, глас 8:.

Савва Крыпецкий, Псковский, прп.

Пустыни явился еси доброе насажде­ние, преподобне, / от юности бо и в мире изволил еси чистое житие; / ревнуя же большему, и дом отеческий оставил еси, / и, вся красная мира сего презрев, / от чуждых стран пришел еси / во обители Богоспасаемаго града Пскова, / и послушанию преподобнаго Евфросина предался еси; / таже простираяся умом еще к вящшему, / вселился еси в пустыню, / в нейже обитель пречестну воздвигл еси, / и множество инок собрал еси, / и их наставил еси на путь истинный. / Темже и Христос, Емуже в жертву себе принесл еси, / видев твоя благия труды, / яко пресветла тя светильника, / и по преставлении чудесы обогати, Савво, отче наш. / Молися убо присно Ему о стране нашей, / еже дароватися ей на враги победам, / стаду же твоему от враг ненаветну пребыти, / и всем нам спастися.

Тропарь. Савве Освященному, глас 8:.

Савва Освященный, Муталаскский, игумен

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Савво, отче наш, / моли Христа Бога спастися душам нашим.

Тропарь. Савве Сторожевскому, Звенигородскому, глас 8:.

Савва Сторожевский, Звенигородский, игумен

От юности божественною распаляемь ревностию, / возлюбил еси чистое житие, / презрев мира сего красная и суетная, / последовал еси твоему Богомудрому учителю, преблаженному Сергию, / в труде и бдении, в посте и подвизе: / на Сторожи явлься безмолвия ради и стражи духовныя, / недремленным на Божественней стражи предстоянием / стяжал еси ум, зряй к Богу, / и демонския козни и обстояния прозираяй: / озарение Пресвятаго Духа в себе восприем, / яко звезда пресветлая возсиял еси верным. / Темже и премудр и светозарен предстоятель / и пастырь стаду твоему явился еси, / светом твоим просвещаяй и всех, / приходящих тебе верою, отче наш Савво, / и моли Христа Бога, да спасет души наша.

Тропарь. Савватию Соловецкому, глас 3:.

Савватий Соловецкий, прп.

Удалився мира и водворися в пустыни, / добрым подвигом подвизався, злостраданием, и вниманием, и молитвами. / Отнудуже и по смерти источаеши исцеления, Савватие отче наш, / моли Христа Бога спастися душам нашим.

Тропарь. Сампсону странноприимцу, глас 4:.

Сампсон Странноприимец, прп.

В терпении твоем стяжал еси мзду твою, отче преподобне, / в молитвах непрестанно терпевый, / нищия возлюбивый и сия удовливый, / но молися Христу Богу, Сампсоне милостиве блаженне, / спастися душам нашим.

Тропарь. Севастиану Сохотскому, Пошехонскому, глас 4:.

Севастиан Сохотский, Пошехонский, прп.

Удалився мира и водворився в пустыни, / добрым подвигом подвизася, / злостраданием, и вниманием, и молитва­ми, / отонюдуже и по смерти источаеши исцеления, / Севастиане, отче наш, / моли Христа Бога / спастися душам нашим.

Тропарь. Серафиму, Саровскому чдтв., глас 4:.

Серафим Саровский, прп.

От юности Христа возлюбил еси, преподобне, / и Тому Единому поработати пламенне вожделел еси, / в пустыннем житии твоем непрестанною молит­вою и трудом подвизался еси, / умилен­ным сердцем любовь Христову стяжав, / Небесным Серафимом в песнословии споборниче, / в любви притекающим к тебе Христу подражателю, / темже избранник возлюблен Божия Матере явился еси, / сего ради вопием ти: / спасай нас молитвами твоими, радосте наша, / теплый пред Богом заступниче, / Серафиме блаженне.

Тропарь. Сергию, игумену Радонежскому, всея России чудотворцу, глас 4:.

Сергий Радонежский, игумен

Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же и пощениих образ быв твоим учеником; / темже и вселися в тя Пресвятый Дух, / Егоже действием светло украшен еси. / Но яко имея дерзновение ко Святей Троице, / поминай стадо, еже собрал еси, мудре, / и не забуди, якоже обещался еси, / посе­щая чад твоих, / Сергие преподобне, отче наш.

Тропарь. Сергию Шухтомскому, глас 8:.

Сергий Шухтомский (Шухтовский), схимонах

Бденными молитвами и потоки слез­ными пустыню напоил еси / и из глубины воздыханьми ю расплодил еси / и бысть постнически равно Ангелом житие твое; / страдальчески бореньми, яже от бесов и от ненаказанных человек, претерпел еси / и Ангелом собеседник явися, / Божественнаго винограда насеятель быв; / и, оставив временное житие, преселился еси в жилище Небесное. / Темже тя почитаем, преподобне отче наш Сергие, / моли Христа Бога спастися душам нашим.

Тропарь. Сергию Нуромскому (Вологодскому), глас 8:.

Сергий Обнорский, Нуромский, Вологодский, прп.

Желанием духовным разгарашеся, пребогате, / слез твоих течением душу свою напоил еси / и еже из глубины воздыханьми уязвляше сердце свое, / и бодренными молитвами, и всенощным предстоянием Владыце Христу / многодобродетелен плод принесе сам себе. / И сего ради яко Божий угодник светло миру показася, / сияя чудесы, Сергие отче наш, / теплый молитвенниче к Богу, всегда о нас Того моли, / да спасет души наша.

Тропарь. Силуану Афонскому, глас 2:.

Силуан * Афонский, прп.

Серафимския любве ко Господу пламенный ревнителю, / и Иеремии, о наро­де плачущему, усердный подражателю, / всеблаженне отче Силуане, / ты зову Матери Господа сил внемляй, /змия греховнаго мужемудренно изрыгнул еси, / и в гору Афонскую от суеты мира удалился еси, / идеже в трудех и молитвах со слезами Святаго Духа обильно стяжа. / Еюже сердца наша вспламени и с тобою умильно взывати укрепи: / Господи мой, жизнь моя и радосте святая, / спаси мир и нас от всяких лютых.

Тропарь. Силуану, схимнику Печерскому, в Дальних пещерах, глас 3:.

Силуан Печерский, схимонах

Многаго ти ради воздержания и безмернаго пощения / приемый свыше бла­годать чудотворения / и к Богу велие дерзновение стяжавый, / постником удобрение, Силуане, / Тому молися, / да подаст нам мир и велию милость.

См. также:

• Тропари преподобным. Часть 1. Авксентий-Афанасий
• Тропари преподобным. Часть 2. Афанасий-Евфимий
• Тропари преподобным. Часть 3. Евфимий-Ипатий
• Тропари преподобным. Часть 4. Иринарх-Марон
• Тропари преподобным. Часть 5. Мартин-Паисий
• Тропари преподобным. Часть 7. Симеон-Харитон. Анастасия-Гавриил
• Тропари преподобным. Часть 8. Григорий-Феодосий